تاخذ الام المفاتيح لغرفة سمر .. وصارت تجرب مفتاح مفتاح عين على المفاتيح وعين على ابواب شقق عيالها تخاف انهم يسمعونها... واخيرا لقت المفتاح "السبير" ...فتحت الباب بلهفه .. لقت سمر طايحه على الارض بين الحيا والموت .. ماهان عليها منظرها.. وبإحساس الام الحنونه توجهتلها مسرعة الخطا وحظنتها بين ايدينها ...سمر حست بإيدين تمسكها بقوه وارتجفت وهي تقول بعينين مغمضتين..: بس الله يخليكم ايدي توجعني..
الام: انا امك .. انا امك ياسمر ..لاتخافين ماني بضاربتك
سمر لما تأكدت انها امها ارخت راسها بين احضان امها بإرتياح وهي تبكي بهدوء: تعبانه يمي .. جسمي كله يتعبني .. انا بردانه يمه
الام: أي برد الله يصلحك ؟؟؟
سمر:.......
ام سمر شالت بنتها من على الارض وغسلت الدم اللي على وجهها وخلتها تبدل ثيابها بصعوبه .. ونومتها على السرير
سمر تبكي من جديد : يمه ايدي تعورني ..
الام: خليني اشوفها .. ارفعي كمك ..
لاحظت الام الكدمه الهائله على ايد سمر وقربت ايدها تلمسها ..
سمر تصرخ: لا يمه الله يخليك لاتمسكينها ...
الام: طيب انا بوديك الطبيب
سمر بنظره خائفه ونبره باكيه: عامر مايرضى
الام: مو بكيفه مايرضى ..
تنادي الام ..زينب الخادمه .. وتساعدها على حمل سمر .. وتخلي السايق يشغل السياره ..ويروحون للطبيب
::::::::::::::::::::
المغرب كان يأذن ولما طلع عامر يروح للصلاة لقى غرفة سمر مفتوحه على الاخر نادى على امه بعصبيه ولما ماردت عليه نادى على زينب حتى زينب ماردت عليه.. ولقى خادمته بوجهه واللي بدورها بلغته انهم راحوا للطبيب...عصب عامر من قلبه وتوعد بعقاب اشد منه ... بعد مايرجع من الصلاة
وفي المستشفى:
الدكتور:Shes hand is broken
الام تكلم الممرضه:وش يقول تراني ماافهمه ؟
الممرضه: بيأولك ان البنت ايدها مكسوره ... انتوا عاملين فيها ايه...؟؟
الام تطالع سمر بخوف : مكسوره ؟؟
سمر كانت تطالع امها بعينين خائفتين دامعتين
الام تكلم الممرضه بعد ماطلع الدكتور : لو سمحتي كم مدة هالجبس اللي على ايدها ؟
الممرضه: على حسب الحاله...يعني في كسر بيجبر بعد عشرين يوم وفيه كسر بيجبر بعد تلات اربع شهور
الام بحزن : طيب...وكسر النفوس...متى يجبر؟؟
الممرضه وهي طالعه: الله اعلم
ولما طلعت الممرضه توجهت الام لبنتها اللي كانت تبكي بصمت ...
الام: خلاص ياسمر لاتصيحين..حرام عليك والله مااخلي احد يضربك مره ثانيه
سمر:...........