[align=center] الجزء العاشر
قبل عرس البتول بأسبوعين
البتول: نوف بمر عليك بعد صلاة العصر لأن عندي كم شغله أبغي أخلصها
نوف: أوكي راح انتظرك
البتول: اجل يالله فمان الله
نوف: مع السلامه
سكرت البتول الخط
بعد الصلاه راحت البتول لبيت خالتها أم خالد
وصلت للبيت واتصلت في نوف ظل الجوال يرن لمده طويله بعدها ردت نوف وصوتها مبين فيه النوم
البتول: نوفوه وجع للحين نايمه
نوف: هلا البتول سوري بس نسيت اقول للشغاله تصحييني
البتول: وأنا وين أصرفها سوري يله قومي تأخرنا
نوف: عطيني ربع ساعه بس
البتول: وتبغيني أحتريك طول هالمده بالسياره
نوف: لا أنزلي أجلسي بالصاله وترى البيت فاضي مافيه أحد
البتول: أوكي بس استعجلي
نوف: اوكي
نزلت البتول وجلست بالصاله تحتري نوف
البتول: أوف هذي وش تسوي كل هذا تبدل ملابسها
طلعت البتول لغرفة نوف ودقت الباب
البتول: نوفوه شتسوين السوق سكر وأنتي للحين ماطلعتي
نوف: يالله هذا أنا نازله بس قولي للشغاله تعطيك عباتي
البتول بدت تعصب: ليه حد قالك أني أشتغل عندك بس الشرهه علي اللي قلت لك تجين معي يالله بس أطلعي أنا بنتظرك بالسياره
نزلت البتول للصاله وفي وقتها كان خالد داخل للبيت وأول ماشافها جمد في مكانه البتول تغطت بسرعه وتقدمت تبغي تطلع حست بان الحزن اللي هي فيه بسببه وبسبب تجاهله لها يبين لها بروده بس كل ماتلتقي به تشوف في عيونه حب لها معقوله كل هذا وهم
خالد: السلام لوجه الله
البتول: وعليكم السلام
خالد: أخبارك يالبتول
البتول: تمام
خالد: واخبار خالتي
البتول: الحمدلله
كانت ردود البتول جافه
خالد: طب ليه تكلميني بهالطريقه
البتول: وشلون تبغيني أكلمك
خالد: مثل ماكنتي تكلميني قبل
البتول : قبل كان الوضع غير
خالد: وليه
البتول: لأني الحين أنا ملك لغيري انا أنسانه متزوجه وعرسي بعد أسبوعين ولازم أحترم الأنسان اللي أرتبط فيه
خالد طول المده اللي طافت كان يتهرب من واقع أنها صارت لغيره
خالد: بس يالبتول
البتول قاطعته: ماأبغي أسمع أي شي كافي اللي شفته
إذا كنت تعزني أبيك تتركني بحالي ياخالد كل شي أنتهى أنتهى
طلعت وتركته
(( ماتعرف ليه قالت هالكلام بس غصب عنها ))
معنى كلامك يالبتول انك تحبيني مثل مااحبك آه يالبتول أنتهى وشلون تطلبين مني أني أنهي روحي ليه يالبتول تقسين علي وربي أني ماتخليت عنك بس بيجي اليوم اللي تعرفين فيه هالشي
طلع من البيت وركب سيارته
البتول كانت جالسه بالسياره وتشوفه وهو يطلع
انا ايش قلت وش اللي سويته ياربي بس قلبي هو اللي نطق قبل عقلي ماني بقادره افهم وش اللي يصير من حولي
طلعت نوف من البيت وركبت السياره
نوف: سلام ياقمر
البتول تكلم السايق: روح للمملكه
نوف: شفيه القمر معصب خلاص قلنا آسفين
البتول : ماردت وظلت ساكته
وصلوا للمملكه واشترت أغراضها
بعدها تعشوا في المطعم ورجعوا البيت
دخلت البتول البيت وهي مزاجها للحين متعكنن من اللي صار
دخلت غرفتها ورمت بأغراضها على الأرض
بدلت ملابسها وتمددت على السرير
المساء في بيت أبو خالد
دخل خالد البيت وشاف نوف جالسه في الصاله ومعاها أكياس
خالد: وين كنتي يانوف
نوف: كنت طالعه مع البتول للسوق
رن جوال نوف
نوف: هلا البتول
البتول: نوف شوفي كيس العطور معك
نوف: لحظه
وبدت تدور في الأكياس بعدها ردت
نوف: أي يالبتول لقيته موجود في أغراضي
البتول: أوكي بس حبيت اتأكد خفت أني نسيته في السوق يالله مع السلامه
نوف: مع السلامه
وحطت الجوال على الطاوله
خالد: نوف قومي جيبي لي ماي
نوف: ياربي بدت الطلبات
وراحت نوف للمطبخ وهي تنافخ
أخذ خالد جوال نوف وأخذ منه رقم البتول ورجع الجوال مكانه
وطلع لغرفته
دخلت نوف الصاله ومالقت خالد
نوف: أف يطلب الماي ويروح
في غرفة خالد
مايعرف الشي اللي قاعد يسويه صح ولا غلط
أرسل لها رساله
لحظه....... لحظه
من عطاك الحق تنساني وتروح
لحظه........ لحظه
من عطاك الحق تنساني وتروح
وتنهي أحلامي معاك
وكل وعمري واللي عشته من سنين
وحده وحده
حتى أستوعب كلامك والجروح
أنت فاهم شنهو يعني انتهينا
شنهو يعني انتهينا
بكلمتين
بكل سهوله انتهينا كلمه قالتها وراحت
وأنا ماني قادر أفهم شنهو يعني أنتهينا
يعني ماعدنا حبايب وأنهدم كل شي فينا
المحبه والأماني والسنين اللي قضينا
شنهو يعني أنتهينا؟
ليش ماقلتي من أول ترى هالرحله قصيره
ومهما طال الحب فينا أعتبرنا مابتدينا
آه لو قلتي من أول قبل لا تفرق تعلم
المحبه بحر لكن بحرها من غير مينا
شنهو يعني أنتهينا؟
شلون مامرت في بالك لحظة الفرقا حبيبي
وأنك أنت مثل غيرك والقدر ماهو بيدينا
ليش ياأجمل وأغلى من عرفته في حياتي
ماعرفنا هالمحبه ولا أصلا مالتقينا
((خالد))
البتول: آه ياخالد ليه تبغي تعذبني الحين تذكر أني حبيبتك وين كنت قبل ليه توك تبين لي مشاعرك ليه بس خلاص الوقت فات لهالكلام
رجع جوالها يرن بصوت مسج:
آه لو باكر لأمسي يلتجي .. يترك الليلة ليالي وما يجي
آه أنا من غدر باكر كم أخاف .. ياخذك مني وأنا لقلبي شغاف
حزنها في غيبتك مر و شجي
آه أنا من غيرك أنتي وش وجودي .. آه أنا كم أبغى باكر لو تعودي
آه من ذكرى بتشعل بي سهادي
ياملاذي ومنتهاي و أولي .. ايه أحبك فوق ما تتخيلي
ليت أنا يا بعد قلبي لي قلوب .. لأجل ما في كل لحظة بك أذوب
كل إجاباتك أنا لا تسألي
ما أبي شمسك يواريها مغيب .. لو جروحي منك ما ودي تطيب
ياللي سعدك منتهى غاية مرادي
آه كم أشتاقلك .. آه كم أحتاجلك
آه كم أشتاقلك وأحتاجلك .. في القرب وأكثر في بعادي
أنتي أحساسي الاكيد
وأنتي دمي اللي بيجري في الوريد
أنتي يا عمري بلادي
البتول:تاخرت ياخالد تاخرت
خالد كان ينتظر منها أي رد بس خاب ظنه
في القاعة
كانت لمسات البتول واضحه في القاعة وتعبر عن روحها الحلوة كانت القاعة مزينه بالورود الوردية والفراشات
جا وقت الزفه طفت الأنوار وطلت عليهم البتول بفستانها الأبيض فتحت الظهر كبيره تزينها فراشه مطرزه بطريقه روعه وطرحتها تتكون من قسمين ينزلون على أكتافها بحيث أنها ماتغطي الظهر
كان هالليلة بهاكي ماهو عادي
كنتي أنتي وانتي لما تكوني أنتي ماهو عادي
كنتي اعجاز وسحر .. كنتي دنيا من طهر
كان نورك في جبين الكون بادي
كان في صمتك طرب .. وكان في عيونك شغب
كان حسنك للحسن يرسي مبادي
كنتي في أجمل حضورك .. وكنتي في أعدل غرورك
بعدها بدوا البنات يسلمون على البتول وبدا الرقص لحد ماجاء الوقت لزفة المعرس في هاللحظه دخل عمها مع بندر ونواف حست بالألم وهي تشوف عمها تذكرت أبوها كانت تتمنى انه يشاركها فرحتها وقفت احترام لعمها
تقدم لها وباسها على راسها:مبروك بابنتي الله يوفقك ان شاء الله
البتول:الله يبارك فيك عمي
تقدم بندر :ألف مبروك يالبتول
نزلت راسها وما ردت
نواف: الف مبروك يالغاليه
البتول: الله يبارك فيك
جلس دقايق وبعدها طلعوا من القاعة وتوجهوا للفندق
عند بوابة القاعه كان خالد واقف يشوف حلمه وعشقه يروح لغيره
ركبت البتول السياره وتحركت السياره بعيد عن القاعه
رجع خالد لسيارته وضيق الكون يملى صدره
خلاص يالبتول خلاص صرتي لغيري شلون ضعتي مني بهالسهوله
ركب سيارته وتحرك بعيد عن القاعه
وين رايح ياخالد
تبغي تهرب من الواقع
شغل الراديو على قناة الfm
قالوا ترى مالك أمل في قربها لويوم
أبعد وجنب دربها وهذا هو المقسوم
قلت أتركوني وأسكتوا خلوا العتب واللوم
قدني غرقت في بحرها ولا عاد يفيد العوم
قالوا ترى في حبها ويل وأسى وهموم
قلت أن قتلني حبها حسبي تقل مرحوم
قالوا لي أنسى ذكرها منت بها ملزوم
قلت أبشروا ياعاذلين بنسى لذيذ النوم
قالوا بتلقى غيرها وأترك هواها اليوم
قلت العفو ياحاسدين ماأبدل قمر بالنجوم
قالوا لغيرك حبها قلت الجواب مفهوم
دام أنها متهنيا وشلون أصير محروم
بقضي الليالي أنتظر صابر على المقسوم
متعلق بطرف الأمل يمكن يجيني نوم
قالوا ترى مالك أمل في حبها لويوم
أبعد وجنب دربها وهذا هو المقسوم
نجد كانت تتصل في اخوها بس مايرد خافت عليه
اتصلت لفهد
فهد:هلا نجد
نجد:خالد معك
فهد:لا ليه شصاير
نجد:لا بس اتصل له ومايرد
فهد:خلاص انا بتصل به وبرد عليك
اتصل فهد لخالد
خالد: نعم
فهد:الله ينعم عليك وينك
خالد: موجود وش بغيت
فهد: انت قولي وينك وانا اجيك
خالد:فهد تكفى ودي اجلس لحالي
فهد: على راحتك بس بتصل اتطمن عليك مره ثانيه
خالد:ليه شايفني بزر
فهد: لا خايف عليك لا تضيع
خالد: ومن قال لك اني ماضعت
فهد:ماادري وش اقول لك
خالد:لاتقول شي يالله مع السلامه
سكر الخط واتصل فهد لنجد يطمنها على خالد
خالد ركب سيارته وماكان عارف وين وجهته بدى يبعد عن الرياض ماحس بنفسه غير وهو بالمزرعه
ليه جيت هنا يمكن لانه اكثر مكان لي فيه ذكريات معها
نزل المزرعه وبدى يتمشى فيها
ويتذكرها
تذكر اخر موقف جمعه بها شلون كانت قريبه منه بس اليوم صارت بعيده
تذكر ايام طفولتهم ولعبهم
اه ياليت ماكبرنا وظلينه صغار بس تكونين قريبه مني
ايام حلوه كانت ايام حبك
كنت في روحي تسري
كنت بجنون احبك
وين موعد جمعنا
وين ذاك المكان
وضحكنا اللي ضحكنا
والوله والحنان
تقلب الكون كله
لو تاخرت خطوه
ضعت مني في ثواني
والله دنيا ماتسوى
بعد أسبوع
دخل بندر ومعاه البتول لبيتهم بعد ماقضوا لهم أسبوع في الفندق لان طلال رفض فكرة السفر بعذر انه مشغول
نزلت البتول الغطا عن وجها كان يميز البيت ألوانه الدافيه كانت الصاله عبارة ثلاث جلسات كل جلسه تمتاز بلون وستايل خاص ودرج من الرخام جاي بشكل دائري وشد انتباها جلسه في زاوية البيت تميزها شبابيكها الكبيرة الي تطل على الحديقة
بندر: شرايك نشوف باقي البيت
طلعوا للدور الثاني توجد فيه3غرف وصالة لها بلكونه كبيره وفيها مطبخ تحضيري صغير
توجهوا للغرف بندر: هذي بتكون غرفتك
استغربت البتول والتفتت له بس رجع يتكلم وغرفتي مقابل غرفتك زادت صدمة البتول
انا بطلع وأخليك تأخذين راحتك وترتبين أغراضك
طلع وتركها محتارة لهم أسبوع وهي تحس أن تصرفاته غريبه معاها ظلت فترة تفكر بهالوضع
البتول:خلني أروح اكلم أمي
الو هلا يالغاليه شاخبارك
سعاد:هلا والله بنور عيني انا الحمد لله بخير دامك بخير أنتي شاخبارك وشاخبار بندر
البتول:الحمد لله بخير أخبار نواف
سعاد:الحمد لله والله مشغول يأثث جناحه
البتول:حددتوا موعد العرس
سعاد: أن شاء الله بيكون بعد شهر
البتول: مره قريب ماعاد فيه وقت
سعاد: وش اسوي نواف مستعجل جنني معه والبنت جاهزه
البتول:الله يوفقه يالله يمه أنا بروح أرتب أغراضي تأمرين بشي
سعاد: لا تسلمين وسلمي لي على بندر
البتول: الله يسلمك
وطلعت لغرفتها بعد ماطلبت من الخادمه تساعدها في ترتيب أغراضها
في جناح فهد
دخل فهد البيت وكان هادي راح لجناحه وشاف نجد وهي مندمجه تغني مع الأغنيه وماأنتبهت له
دخل بشويش علشان ماتحس فيه
قرب منها
فهد:بوووه
نجد ارتاعت ونقزت من مكانها
حرام عليك طلال ماتخلي حركاتك
فهد سكت وهو يطالعها
نجد عضت على شفتها ونزلت راسها
فهد حاول يضيع الموضوع:هههههههههههه
ماتوقعت انك خوافه لهدرجه
نجد ماردت
فهد: انا جيت اقول لك تنزلين عند امي لاني بطلع اوصل تركي للمطار وامي قالبتها عزى تحت
نجد: ان شاء الله
وقبل لا يطلع
نجد: انا اسفه على..........
فهد : مافي داعي للاسف الواحد منه مايقدر يمنع اللي في قلبه ويكبت مشاعره
وطلع حاول يبين لها انه ماهو متضايق من اللي صار
نجد كانت طول المده تحاول قد ماتقدر تمنع نفسها من انها تذكر اسمه
ثاني يوم العصر
في بيت ابوخالد
نوف كانت جالسه في الصاله وتحس بالملل
دخل خالد البيت وهو على حاله من بعد زواج البتول من شغله للبيت ومن البيت للنادي واغلب وقته ساكت
نوف:خالد
خالد:هلا
نوف: شرايك نطلع احس بملل
خالد:امي وين هي فيه
نوف:عند الجيران
خالد:وين تبغين تروحين
نوف:ماادري بس تمللت ابغي اطلع من البيت
خالد: ماني بفاضي لك
نوف:وانت من متى تفضى
خالد طلع لغرفته بدون مايرد عليها
نوف:اف الكل سافهني بهالبيت
رن جوالها وكانت نجد
نوف:نعم
نجد: ليه عروستنا زعلانه
نوف:ملل جالسه لحالي ومحد معي
نجد:انا متصله اقول لك ان فهد بيروح مع ربعه لجده يومين وراح اجي انام عندكم
نوف: قولي والله اجل خليني اكلم البنات ونجتمع والله لسوي لكم حفلة دي جي لا صارت ولا استوت
نجد:هههه سوي اللي تبغيه وطلعي جنانك قبل العرس
نوف:يالله باي ماعندي وقت لهالكلام
سكرت الخط واتصلت على البنات تقول لهم
بعد المغرب
كانوا البنات مجتمعين
الريم: ها نوف خلصتي من تجهيزات العرس
نوف:أي والله تعرفين انا كنت اجهز مع البتول
دانه: على طاري البتول وينهي فيه
نجد: ان شاء الله بتجي
العنود كانت تهمس للريم:اف ثقيلة الدم راح تجي
الريم ضربته بخفه
نوف:طيب وانتي يالريم خلصتي
الريم:والله انا اجهز على راحتي مثل ماانتي عارفه باقي على العرس وقت طويل
البتول وصلت للبيت
البتول: نواف لا تاخر علي
نواف:ان شاء الله عمتي
البتول:ههه زين خلك كذا تسمع الكلام
نواف:طيب سوي لي خدمه وحده
البتول: وش تبغي
نواف: كلمي نوف خليها تطلع ابغي اشوفها
البتول: وليه ماتدق عليها
نواف: ليه انتي ماتدرين انها قررت اني مااشوفها ولا اسمع صوتها لحد يوم العرس
البتول:هههههههههه وليه
نواف: انا ادري انتوا البنات عندكم سوالف وحركات
البتول: طيب شوف شراح اسوي لك بس تضمن لي انها ماتسوي لي شي
نواف: على ضمانتي وربي ماانسى لك هالخدمه
اتصلت لها
نوف: وينك ترى الحفله بتبدي
البتول: اسمعيني لا تتكلمين قدام احد
نوف: ليه
البتول: انا بالحديقه ودي اقول لك شي قبل لا ادخل
نوف وهي تتكلم بهمس: شصاير
البتول: انتي تعالي وانا اقول لك
نوف: يالله انا جايه
العنود: على وين
نوف: اروح اجيب باقي السي ديات
طلعت للحديقه وما شافت البتول
نوف: وين راحت
نواف: حرام عليك اشتقت لك
نوف التفتت له: نواف
نواف: كل هذا تغلي لا تتصلين ولا تخليني اشوفك
البتول: دخلت للبيت وسلمت على البنات
وطبعا العنود لحد الحين وهي ماتحبها
نجد: اهلين بعروستنا
البتول: هلا فيك
دانه: يالله الشله اكملت وين راحت نوف
البتول: لا نوف خلوها
نجد: ليه
البتول قالت لهم بالي سوته والبنات اضحكوا عليها
نجد: الله يعينك عليها وربي ماتخلصين من لسانها
البتول: لا حبيبتي انا عندي واسطه
نجد:نواف
البتول:أي
نوف:نواف البنات ينتظروني لازم اروح
نواف:لا ماراح اخليك
نوف: نواف
نواف: طيب روحي كلها اسابيع وتكونين عندي ووقتها ماراح اخليك
نوف انحرجت منه ورجعت للبيت ركض
اول مادخلت الصاله
البنات كانوا يصفرون لها وهالشي خلاه تنحرج اكثر
نوف: البتول وربي لاوريك
البتول: شوفي انا اخت زوجك ولازم تحترميني والا راح اتصل الحين في نواف واقوله
نوف سكتت وماقدرت تقول لها شي
وبدوا حفلتهم
بعد مانتهت الحفله والبنات راحوا
دخل خالد البيت
شم ريحة عطرها
معقوله البتول هنا
شاف نجد تنزل من الدرج
خالد:نجد
نجد:هلا خالد
خالد: البتول كانت هنا
نجد: وانت كيف عرفت
خالد: ريحة عطرها تملى المكان
نجد: خالد خلاص انسى البنت متزوجه
خالد: ماهو بكيفي يانجد اذا قلبي يعصيني وماهو راضي انه ينساها قولي لي وش اسوي
نجد ماكانت تقدر تقول له شي لانه تعرف الحب والواحد اذا حب صعب انه ينسى بسهوله
طلع لغرفته وهو يتمنى لو انه قدر يرجع بدري ويشوفها
في بيت بندر
دخل بندر للبيت وكان الجو بره ممطر ونسمات الهوا باردة لاحظ انه البيت هادي وكان محد فيه وين راحت البتول اتجه للدرج وقبل مايصعد لاحظ باب المطل للحديقه مفتوح راح بيسكر الباب بس لاحظ انه في حد واقف برى تحت المطر انتبه لها
بندر: البتول شسوين
كانت البتول واقفه تحت المطر وفاتحه ذراعها ورأسها مرفوع لفوق وتبتسم, ظل يناظرها شكلها كان مره حلو شعرها متطاير على وجهها
البتول:سلامتك بس أنا لازم أمارس هالطقوس في هالجو
بندر ضحك على كلامها:طيب الجو بارد راح تمرضين ادخلي
بدا المطر ينزل بكثره رجعت البتول للباب تركض وكانت البسمه مرسومه على وجهها
بعدك طفلة يالبتول وماكبرتي
وصلت للباب وكانت واقفه قدام بندر رفعت راسها وكان بندر يناظرها ويتأمل ملامح وجهها,أول مره ينتبه لملامحه عيونها ساحره وتميزها رموشها الغليظه تقاسيم وجهها الطفولي طالت النظرات بينهم هاللحظه دوى صوت الرعد بقوة ومع صوته انقطعت الكهرباء عن البيت ارتاعت البتول من صوت الرعد ولاشعوريا منها ارتمت في حضن بندر(البتول كانت دايما ترتاع من صوت الرعد ودايم كانت ترتمي في حضن أبوها من تسمعه بس الحين)
جمد بندر في مكانه راسها على صدره ويحس بأنفاسها المتسارعه يحس بان قلبه بيطلع من صدره رفع يده وبدا يمسح على راسها,بعد لحظات
بندر:البتول
البتول حست بدفا وأمان فقدته بعد وفات أبوها
انتبهت البتول على نفسها وابتعدت بسرعه عن حضنه
البتول بارتباك بان على صوتها: انا أسفه
بندر:تعالي نروح نجيب لنا شمعه تنور المكان اتجهوا للمطبخ فتح بندر الدرج واخذ الشمعه ولعها والتفت للبتول كانت ترتعش انتبه بندر لحالها
بندر:أقول البتول خذي الشمعه وطلعي غيري ملابس ولاتراك بتمرضين
البتول:لا لا أخاف من الظلمه بجلس معك لحد مايرجع النور
بندر ابتسم :بطلع معك لحد غرفتك وبظل واقف عند باب غرفتك لحد ماتخلصين
البتول:لا مافي داعي
بندر:يله بلادلع امشي قدامي
مشت البتول وطلعت لغرفتها وبندر ظل ينتظرها عند باب الغرفه
غيرت البتول لبسها ولبست لها بجامه ورديه وكان مرسوم عليها دبدوب ماسك قلب مكتوب فيه ilove u خذت معها شال كبير لأنها كانت تحس بالبرد
طلعت ولقت بندر واقف عند الباب ينتظرها, نزلوا للصالة تحت كانت الستائر مفتوحه جلست البتول تناظر الجو كان الصمت يعم المكان
قطع صمتهم صوت الرعد مرة ثانية حطت البتول يدها على أذنها ماتبغي تسمع صوته, انتبه بندر لها
بندر: البتول شفيك
البتول كانت تتمنى لوانه يقدر يحضنها تبغي تحس بالأمان
البتول: لا بس أخاف من صوت الرعد
بندر:لا تخافين انا معك
معي بجسمك يابندر بس غايب عني بروحك عجزت أفهمك
حس بندر أن البتول ترتعش
بندر:ليه ترتعشين كذا
ماله داعي يالبتول كله صوت رعد
البتول:لا بس أحس بالبرد
بندر تقدم لها وحط يده على جبينها ولقاها بارده
بندر:شكلك أخذتي برد تمددي على الكرسي وارتاحي
تمددت البتول على الكرسي وغطاها بندر بشالها استسلمت البتول للنوم لأنها كانت تحس بالتعب
ظل بندر يناظر في البتول وكأنها ملاك نايم جمالها إلي شده لأول مره يلاحظ ملامحها
الساعه 5الصبح
كانت نجد تتقلب على السرير ماهي بقادره تنام قامت وطلعت للبلكونه هذي اول مره من تزوجت تنام بعيد عن فهد
تعودت على وجوده معها بالرغم من انها ماعرفت مشاعرها اتجاهه
في جده عروس البحر الاحمر
فهد حالته ماتقل عن نجد لا ويمكن اكثر وجودها غير اشياء في حياته
رجعت له بسمته
روحه المرحه
ماينكر انه مال لها بشكل كبير
والاهم بدا يحبها هالشعور اللي صار يخاف منه
شاف ساعته
معقول تكون جالسه
اتصل لها
نجد سمعت صوت الجوال وراحت تشوف من
كان فهد
ابتسمت وهي تشوف اسمه
نجد:الو
فهد:ازعجتك
نجد:لا كنت جالسه
فهد:وش اللي مسهرك
نجد:ابد ماجاني نوم
ظلوا ساكتين للحظات مايعرفون شيقولون
فهد: وين رحتي
نجد: موجوده
فهد: اخليك تنامين بس بغيت اسمع صوتك
نجد كانت تبغي تقوله انها هي بعد كانت تنتظر اتصاله بس ماقدرت
فهد: ماتبغين تقولين شي قبل لا اسكر
نجد:الله يحفظك
فهد:مع السلامه
ارتاحت بعد ماسمعت صوته وقدرت تنام
فتحت عينها كانت تحس بثقل في راسها التفتت حواليها شافت بندر نايم على الكرسي
تذكرت اللي صار أمس،انتبهت بان النور رجع للبيت قامت من مكانها وتقدمت لبندر وغطته ,
طلعت لغرفتها تتوضأ وتصلي الفجر بعدها نزلت للصاله
طلت من الشباك شافت بأن المطر وقف عن الهطول وبدا الصبح يطلع
البتول:آه مااحلى ريحة الأرض من بعد المطر
حست بان حد واقف وراها التفتت شافته بندر
بندر: من متى وأنتي صاحيه
البتول: ماصارلي نص ساعه
بندر: شاخبارك الحين
البتول: تمام
بندر: انا بطلع غرفتي أصلي الفجر
وقبل مايطلع الدرج التفت لها
بندر: أقول البتول ياليت تجهزين لي الفطور لأنك أمس نومتينا من غير عشا
ابتسمت البتول: إنشاء الله
طلعت لغرفتها تغير ملابسها لبست بنطلون جينز غامق وبلوزه بيضا شتويه مطبوع فيها كلمات باللون الأحمر ورفعت شعرها على شكل ذيل حصان كانت طالعه مره كيوت بهاللبس
راحت للمطبخ تجهز الفطور أخذت الصينيه وقبل ماتطلع من المطبخ دخل بندر
البتول: شرايك نفطر بالحديقه
بندر: بس أخاف يكون الجو بارد عليك
البتول: لا الجو بره مره حلو وانا مدفيه نفسي
بندر: على راحتك
طلعوا للحديقه وكان الصبح بأوله والعصافير تتطاير وتغرد وكأنها فرحانه بالمطر
كانوا يفطرون بصمت
بندر كان حاب يكسر هالصمت:أقول البتول
البتول:سم
بندر: ماكنت أظن انك تخافين من الرعد والظلام قال لها وهو يبتسم على جنب
البتول تغير لون وجهها كان متعمد انه يحرجها
أسمعت صوت بندر وهو يضحك وزاد إحراجها
البتول:ومن قالك أني أخاف
بندر: ابد مايحتاج انه أحد يقول لي انا شفت بعيني كنتي ترتجفين وكأنك عجوز بردانه
البتول عصبت من تعليقاته عليها وقفت بتدخل
بندر: على وين كنت امزح معك
البتول: أحد قالك ان مزحك ثقيل
ودخلت للبيت
ابتسم بندر على تصرفاتها الطفوليه: هذا أنتي يالبتول مثل ماكنتي الطفله المدللة
دخل للبيت وسمع صوت التلفزيون جاي من الصالة كانت البتول واقفه قدام الشباك
وتسمع أغنية فيروز
اديش كان في ناس
ع المفرق تنطرناس
وتشتي الدنيه
ويحملوا شمسيه
وانا بأيام الصحو محدا نطرني
طلع بندر لغرفته وبدل ملابسه ونزل مر على الصالة والبتول مازالت على وضعها
بندر: البتول انا طالع بروح للشركة
مالتفتت له ولاردت عليه ظن أنها للحين زعلانه طلع وركب سيارته
لحظتها البتول كانت تبكي الجو يذكرها بابوها كان يحب برد الشتاء وجلست الصبح وصوت فيروز
آه يايبه فقدت الحب والأمان من بعدك أحس أني وحيده بهالزمن من رحت وأنا فاقده السعاده
ماحست بنفسها الاوهي نايمه على الكرسي
بعد صلاة الظهر اتصل بندر على البتول يخبرها ان الغدا بيكون في بيت أبوه
طلعت البتول لغرفتها تجهز قبل مايجي بندر
رن جوالها
بندر: هلا البتول يله انا تحت نزلي
لبست البتول عباتها وركبت السياره
البتول: السلام عليكم
بندر: وعليكم السلام
تحرك متجهه لبيت أبوه اللي يبعد عن بيتهم10دقايق
وصلوا ونزلوا للبيت نزلت البتول غطا وجها
عمها ابومحمد:
هلا والله وغلا بريحة الغالي
ابتسمة البتول لعمها وقربت منه وباسته على رأسه
البتول: هلا فيك عمي
ابومحمد: شاخبارك يابنيتي
البتول: بخير ياعمي
في هاللحظه دخلت أم محمد: هلا والله ببنيتي
تقدمت البتول لخالتها وباستها على راسها :هلا فيك ياخاله
أم محمد: شاخبارك يالبتول وأخبار أمك
البتول: الحمد لله ياخاله طيبين
أم محمد: وينها لنا زمان ماشفناها عسى ماشر
البتول: ماشر بس الوالده من بعد وفاة أبوي وهي صايره ماتحب تطلع كثير
أم محمد: الله يصبر قلبها
البتول: أمين
ام محمد: الا نواف متى عرسه
البتول: بعد10 ايام
ام محمد:الله يوفقهم ان شاء الله
ابومحمد: الغدا جاهز ياام محمد
أم محمد: أي جاهز بروح أحطه على الطاولة
البتول: خلك مرتاحه انا بجهز الغدا
أم محمد: تسلمين يابنيتي
راحت البتول للمطبخ تجهز الغدا
أم محمد: الله حرمني من البنات بس عوضني بالبتول الله يحفظها ويخليها حطها في عيونك ياوليدي والله أنها دانه متلاقي مثلها
بندر: لاتوصين يمه البتول بعيوني
دخلت البتول الصاله لحظتها: تفضلوا الغدا جاهز
ابومحمد: يله تراني ميت من الجوع
بندر: خسى الجوع يبه
بعد الغدا طلعت البتول لجناح عبير زوجة عبدالله
عبير حالتها النفسيه للحين تعبانه بعد ماأجهضت للمره الثانيه
البتول: عبير حبيبتي أن شاء الله الله بيعوضك وبيرزقك بدال الواحد بعشر
عبير: بس هذي ثاني مره يالبتول وأنا خايفه أن كثرة الأجهاض تأثر علي وماأقدر أحمل مره ثانيه
البتول : ليه هالتشائم ربك كريم وبعدين أحمدي ربك الله رزقك بماجد
عبير: الحمد لله على كل حال
البتول: الأ أقول عبير ليه ماتروحين أنتي وعبدالله لمكه تغيرون جو وبعدين أكيد بترتاح نفسيتك هناك
عبير: والله عبدالله توه من يومين قال لي بس أنا ماأقدر أروح لأن أهلي مسافرين وماعندي مكان أخلي فيه ماجد ومثل ماأنتي عارفه خالتي حرمه كبيره وماراح تقدر على ماجد
البتول: وليه وأناوين رحت خليه عندي
عبير: بس انتي توك عروس وفي شهر العسل ومانبغى نتعبك معنا
البتول في نفسها أي عروس وشهر عسل : بلى بس وخرابيط مالها معنى أنتي تعرفين أنا شكثر أحب الصغار
عبير: الله يرزقك ان شاءالله
البتول بان على وجها الحزن:امين
جاهم صوت ماجد:ماما ماما
عبير: هلا حبيبي
ماجد: بابا جى
تغطت البتول: يله أجل أنا بطلع ماأحب أني أكون عذول
عبير: ههههه الله يحفظك
طلعت من باب الجناح وصادفت عبدالله
عبدالله: هلا يالبتول أخبارك
البتول: الحمدلله بخير
عبدالله: بشريني عبير شلون نفسيتها اليوم
البتول: لا الحمدلله بخير وترى تقدرون تسافرون لمكه وماجد بيقعد عندي
عبدالله: مانبغي نتعبك
البتول: أفا مابها تعب ياولد عمي وماجد بيكون بعيوني بس أنتوا لازم تسافرون علشان عبير
عبدالله: ماتقصرين يله مع السلامه
نزلت البتول للصاله تحت وظلت جالسه مع خالتها لحد ماجى بندر
في السياره
البتول:بندر ممكن توصلني بيت ابوي امي محتاجه احد يساعدها في ترتيب جناح نواف
بندر: اوكي وخذي راحتك هناك بس يمكن مااقدر اجي اخذك
البتول: خلاص بشوف نواف يوصلني او راح ارجع مع السايق
بندر: على راحتك
وصلت لبيت ابوها
دخلت البيت وسلمت على امها
سعاد:ليه ماخليتي بندر ينزل
البتول: مستعجل يمه، وخالتي ام بندر تسلم عليك وتقول من زمان ماشافتك
سعاد: الله يسلمها ويسلمك من الشر بس وين شفتيها
البتول: اليوم عمي عازمنا على الغدا
سعاد: البتول انتي مرتاحه مع بندر
البتول:الحمد لله يمه
سعاد:اكيد يابنيتي ترى انا امك اذا في شي قولي لي
البتول: ليه هالكلام يمه
سعاد: ماادري بس مااحس انك مرتاحه
البتول: تطمني يالغاليه بس يمكن انا للحين ماخذت على بندر وعلى اني صرت زوجه مسؤؤله عن بيت وزوج طول عمري وانا معتمده عليك انتي وابوي الله يرحمه
سعاد:وانتي قد هالمسؤؤليه
البتول: انا طالعه لجناح نواف اشوف ايش ناقصه
وطلعت للجناح
رن جوالها وكانت نجد متصله
نجد: السلام عليكم
البتول: وعليكم السلام
نجد:اخبارك
البتول:تمام شفيك كانك متضايقه
نجد: ابد جالسه لحالي قلت اتصل اسال عنك
البتول: انا بخير الا فهد رجع من جده
نجد:لا
البتول:بس انتي قلتي انه بيجلس يومين
نجد:كلمني اليوم وقال انه بيطول ومايعرف متى بيرجع
البتول:ههههههه
نجد: وليه تضحكين
البتول: عرفت الحين ليه متضايقه لان الحبيب بيتاخر
نجد ظلت ساكته
البتول: نجد تحبينه
نجد: ماادري يالبتول بس احس اني تعودت عليه
البتول:يعني بديتي تميلين له
نجد: ماادري ،الا انتي وينك فيه
البتول: في بيت ابوي ارتب جناح نواف
نجد:يالله اجل اخليك تشوفين شغلك
البتول: مع السلامه[/align]
11-20-2008, 05:14 PM
روآيهـ { الج ــرح أرح ـــم من فرآآقك وبع ـــدك**
العرض العادي
