[frame="7 80"]صبـآح الجوووري
أهلين ياست شموعه
والله موضوعك هذا يبي له ترمز شاهي جنبي
عشان نجيب لك كل حرف كتبناه
يالله نشوف نتذكر سوا
,,
طبعـآ أيـآم الإبتدـآئيه كنت دافور بشكل
أحضر أول الناس وطاولتي أنظف الطاولات لأنها قدام
ويجي المدرس يجلس عندي عليها
وكنت كمـآن خوـآف
< كان مديرهم عليه جلد يخلي اللي مايدرس يخاف يفكر يدرس
المهم إني طلعت من الإبتدائيه وطاولتي محافظه ع شرفها ماجاها شي
عاد نشوف مرحلة المتوسطه
والله المتوسطه إني كان عندي حب غير عادي للكتابه
وكأني كنت باين إني مكبوت بالإبتدـآئيه
وحطيت حرتي كلها بالكفائه
بس وش تبين أقول لك وش أكتب ؟
طبعا حرف الـ S ورقم 9 < شي لابد منه
وغيره كنت أتفلسف أنا وخرابيطي
يعني أسمع لي اغنيه اليوم وعجبتني
تلاقينها بكره ع طاولتي كلها وكأني أحد فروع مكتب روتانا
وبوقت الاختبارات الشهريه كنت انظفها ع الآخر
وأكتب عليها مالذ وطاب من البراشيم وهات ياسنع
عاد والله سالفتي سالفه مع ايام الكفائه بس زين طلعت منها
عاد نجي للدحتيره ( الثانويه )
هالثانويه يا نها تحبني او أنا أحبها
او فيه قصة حب بيننا رابطتنا بالقوه
المهم إني كنت الطالب المفضل للثانويه خصوصا سنة ثاني ثانوي
عاد والله شوفي طالب مخضرم وش يطلع منه كتابات
بأول ثانوي كنت أكتب كل شي
والله ماهب ودب كتبته يعني فيلسوف بشكل
كنت أكتب قصيد مدري وين ساسه من الإعرـآب
وكنت أكتب معاناتي مع مدري الماده اللي أكتب لحظتها
وهكذا تستمر المعاناه
أما ثاني ثانوي هذي قصتها قصه
أنا مدري كم جلسة سنه بهالسنه
الأكيد إني حجزت مكاني ماغيرته طيلت السنوات
وهو تحت المكيف ع طوول
عاد والله طاولتي شبعت كتابات صارت أم الحروف الهجائيه
ولأني بالأخير تحت المكيف
كنت ع مفرق الزاويه يعني خلفي جدار ويساري جدار
عاد هالجدار اللي حولي صار كأنو أبوي اللي بانيه
وقسم ماتركت فيه مكان ابيض الا وكتبت عليه
أذكر كتبت تشكيلة الهلال كامله ووزعت اللعيبه
ومره كتبت أغنية خالد عبدالرحمن الذاهبه كامله
< أخذ عليها تعهد 
وياما كتبت وكتبت بس الأكيد اني أكتب شي سنع
عاد والله انا يعجبوني الطلاب اللي يكونو قدام
ويكونو حريصين ومايغيبون
ويجيبون معهم بدل القلم كل اقلام القرطاسيه
بس يقهرني فيهم برودهم الزايد
مثل طاولتهم انها تظل نظيفه ولا عليها اي كلام
< يقول مايصير هالكلام أنت سعودي لازم تسوي خرابيط
وبثالث ثانوي عساني أحضر عشان أكتب شي
إن حضرت نمت وإن مانمت تلاقوني بغرفة الوكيل أقلبه ابي أطلع
يعني طاولتي مابيني وبينها علاقه ولا عشره
بس محسوبه علي طاوله بالإسم
,,
وهذا اللي عندي ياست شموعه
ومشكوره ع الموضوع الروعه
ودمتي بخير يــآرب[/frame]
04-02-2008, 09:02 AM
العرض الشجري